“Milli mətbuat koronavirusa qarşı” jurnalist müsabiqəsinə material qəbuluna 3 gün qaldı

14/07/2020

SOCAR AQŞ-nin 22 iyul – Milli Mətbuat Gününə həsr etdiyi “Milli mətbuat koronavirusa qarşı” adlı jurnalist müsabiqəsinə qatılmaq üçün son 3 gün qalıb. Müsabiqədə iştirak etmək və 30  mükafatdan birinə sahib olmaq istəyən media nümayəndələri COVID-19 pandemiyası ilə bağlı ictimaiyyəti məlumatlandırmağa xidmət edən materiallarını 16 iyul saat 23:59-dək təqdim etməlidirlər. TV, radio, onlayn mediada  1 iyun 2020-ci il tarixindən etibarən yayımlanmış materialların linkləri bu tarixədəkinfo@inpress.az elektron poçt ünvanına göndərilməlidir.

SOCAR AQŞ-dən bildirilib ki, layihə şirkət kollektivinin müəssisə daixilində yaratdığı “Koronavirusla mübarizə üçün ianə fondu”nun təşəbbüsü və maliyyəsi, “INPRESS PR Solutions” şirkətinin təşkilati dəstəyi ilə həyata keçirilir. Müsabiqənin şərtləri aşağıdakı kimidir:

• Materiallar 1) Pandemiya dövründə səhiyyə və sağlamlıq, 2) Pandemiya dövründə iqtisadiyyatın inkişafı, 3) Pandemiya dövründə təhsil, 4) Pandemiya dövründə xidmət göstərən peşə sahələri, 5) Pandemiya dövründə həyat tərzi, 6) Koronavirusla mübarizədə beynəlxalq əməkdaşlığın rolu və 7) Koronavirus barədə saxta məlumatların ifşası adlı kateqoriyalarının hər hansı birinə aid olmalıdır.
• Materiallar mütləq ictimaiyyətin məlumatlandırmasına və maarifləndirməsinə xidmət etməlidir.
• Materialda qeyd olunan məlumatların mənbələri göstərilməlidir. Əsassız, sübutu olmayan mülahizələrə söykənilməməlidir.
• Multimedia (video, fotoslayder, infoqrafika, test (özünü yoxla) elementlərinin istifadə olunduğu materiallara üstünlük veriləcək.
• Materiallar internet resurslara yüklənərək e-mail vasitəsilə təqdim olunmalıdır. Onlayn media olmayan medialar öz materialını malik olduğu internet resurslarında (sayt, Youtube kanalı, sosial media hesabları və s.) yerləşdirə bilər.
• 1 iyun 2020-ci il – 16 iyul 2020-ci il tarixləri ərəfəsindən əvvəl və sonra yayımlanmış materiallar müsabiqəyə qəbul edilməyəcək.
• Bir jurnalist yalnız 1 material təqdim edə bilər.

Layihənin icra edilməsində “INPRESS PR Solutions” şirkəti SOCAR AQŞ əməkdaşlarına dəstək göstərəcək. Müsabiqənin müvafiq qaydalara uyğun şəffaf keçirilməsinə, seçim prosesinin təşkilinə, münsiflər heyətinin formalaşdırılmasına və qaliblərin seçilərək elan olunmasına birbaşa “INPRESS PR Solutions” məsuliyyət daşıyır.

Karantin qaydalarına uyğun olaraq, materiallar onlayn formada qəbul olunur. Müsabiqədə iştirak etmək istəyən media mənsubları materialların linklərini info@inpress.azemail ünvanına başlıqda “Milli mətbuat koronavirusa qarşı” yazaraq göndərməlidirlər. 16 iyul saat 23:59-dək təqdim olunan materialların şərtlərə uyğunluğu, müəlliflik hüquqları araşdırılıb təsdiq olunduqdan sonra 5 nəfərdən ibarət münsiflər heyətinə təqdim olunacaq. Obyektivliyi təmin etmək üçün mükafatlandırma gününədək jüri üzvləri açıqlanmayacaq. Onlar özləri də digər münsif həmkarlarının kimliyi barədə xəbərsiz olacaq. Hər bir jüri üzvü materiallara fərdi qiymət verəcək və 5 jüri üzvünün qiymətlədirməsi toplanaraq ümumi nəticə çıxarılacaq.

Münsiflərin qiymətləndirməsi ilə ən çox bal toplayan 30 material müəllifi qalib seçiləcək. Müsabiqənin qalibləri 22 iyul – Azərbaycan Milli Mətbuatının yaranmasının 145 illiyi ərəfəsində “INPRESS PR Solutions” şirkəti tərəfindən elan ediləcək. Materialı seçilən jurnaistlərin hər birinə SOCAR AQŞ-nin “Koronavirusla mübarizə üçün ianə fondu” tərəfindən dəyərli hədiyyələr bağışlanacaq.

Müsabiqə ilə bağlı suallar üçün “INPRESS PR Solutions” şirkəti ilə email (info@inpress.az) və telefon : (+994 50 310 42 40) vasitəsilə əlaqə saxlanıla bilər.